Mae'r gynghrair newydd eisiau i'r llywodraeth wneud toriadau sylweddol i ollyngiadau'r DU o nwyon cynhesu byd-eang a gwneud brwydro yn erbyn newid yn yr hinsawdd yn rhan allweddol o'i chynlluniau i ddelio â thlodi byd-eang.

Ar ran cynghrair Atal Anhrefn Hinsawdd yng Nghymru, croesawodd Morgan Parry'r mudiad newydd: "Rydym yn wynebu trychineb, gyda miliynau o bobl mewn perygl o sychdwr difrifol, newyn a chlefydau, a hyd at draean o'r rhywogaethau sy'n byw ar y tir yn wynebu difodiant erbyn canol y ganrif. Mae'r amser wedi dod i ymateb fel mater o'r brys mwyaf. Mae gan y sefydliadau sydd wedi ymuno heddiw gefnogaeth miliynau o bobl, a byddwn yn galw arnynt i fynnu'r camau y mae'n rhaid eu cymryd ar unwaith."

Mae'r mudiad newydd yn credu bod gwleidyddion hyd yn hyn wedi methu â gweithredu hanner digon i fynd i'r afael â'r bygythiad. Bydd y dewisiadau a wneir yn y pump i ddeng mlynedd nesaf yn penderfynu maint y difrod y bydd cenedlaethau'r dyfodol yn ei wynebu. Gyda gweithredu cydgysylltiedig a chan ddefnyddio ei nifer anferth o gefnogwyr, nod ATAL ANHREFN HINSAWDD yw dod yn rym gwleidyddol nerthol o blaid gweithredu.