Yn ystod y tair blynedd diwethaf mae'r Rhingyll Charleston wedi delio â channoedd o achosion o losgi a difrodi anghyfreithlon ar Safleoedd o Ddiddordeb Gwyddonol Arbennig (SoDdGA) yng Nghymru. Un o'i achosion mwyaf llwyddiannus oedd amddiffyn y pâr cyntaf o weilch pysgod i fridio yng Nghymru rhag masnachwyr bywyd gwyllt anghyfreithlon.

Ledled y byd, caiff cannoedd o filiynau o blanhigion ac anifeiliaid, gwerth biliynau o bunnoedd, eu prynu a'u gwerthu'n anghyfreithlon ac yn anghynaladwy bob blwyddyn. Mae hyn yn effeithio'n uniongyrchol ar oroesiad llawer o rywogaethau yn eu hamgylchedd naturiol.

Yng Nghymru mae masnachu anghyfreithlon yn bygwth bywyd gwyllt megis adar bridio prin. Yn fyd-eang mae rhywogaethau sydd mewn perygl megis teigrod a llewpardiaid yr eira yn cael eu gwthio'n nes at ddifodiant gan rwydweithiau masnachu anghyfreithlon.

"Mae llawer o fathau o droseddau'n ymwneud â bywyd gwyllt. " meddai Morgan Parry, Pennaeth WWF Cymru.

"Yng Nghymru, mae angen diogelu bywyd gwyllt rhag gweithgareddau anghyfreithlon megis dinistrio cynefinoedd a dwyn wyau adar. Mae'r wobr hon yn ffordd ardderchog o wneud pobl yn fwy ymwybodol ei bod yn bwysig cael gwell amddiffyniad rhag troseddau'n ymwneud â bywyd gwyllt."