Nid oes dim amheuaeth bellach mai prif achos newid yn yr hinsawdd yw llosgi tanwyddau ffosil, sy'n rhyddhau carbon deuocsid (CO2) a nwyon 'tŷ gwydr' eraill i'r atmosffer. Heb weithredu ar frys, bydd newid yn yr hinsawdd yn difrodi bywyd ar y ddaear. Bydd cannoedd o filiynau o bobl, yn enwedig y tlotaf a'r mwyaf agored i niwed, yn cael eu peryglu'n ddifrifol gan sychdwr, llifogydd, newyn a chlefydau. Erbyn canol y ganrif gallai hyd at draean o'r rhywogaethau sy'n byw ar y tir wynebu difodiant. Mae'r difrod eisoes wedi dechrau. 'Does dim rhagor o amser i'w golli.

Yng Nghymru a Lloegr, mae 5 miliwn o bobl eisoes yn byw mewn ardaloedd lle mae perygl llifogydd ac mae tua 12 y cant o'r tir amaeth a chwarter y safleoedd diwydiannol mewn perygl. Os na wnawn ddim byd i fynd i'r afael â newid yn yr hinsawdd, mae Cymru mewn mwy o berygl o'r canlynol:

• stormydd amlach
• codiad yn lefel y môr
• mwy o law a mwy o fewnlif i aberoedd ac i'r môr
• gaeafau gwlypach (cynnydd o hyd at 20 y cant erbyn y 2080au)
• hafau sychach (hyd at 40 y cant yn sychach erbyn y 2080au)
• sychdwr a phrinder dŵr yn fwy tebygol
• colli gwlybaniaeth y pridd, yn enwedig yn yr haf

Mae'n bosibl y gall perygl llifogydd yn 2080 fod hyd at 30 gwaith yn fwy nag ydyw ar hyn o bryd, oherwydd effeithiau cynnydd yng nghodiadau lefel y môr ynghyd â llanwau storm mwy eu maint.